أزاي تعرف ال Target Audience؟
عشان تعرف تعمل محتوى قوي يبيع بأرقام عالية؟
يبقي لازم تعرف الأول مين هما الــ Target Audience بتوعك ، الي هما الفئة المستهدفة
عشان كل فئة من الناس ليها طريقة كلام وإقناع غير التانية.
إنت نفسك هتلاحظ إنك بتتكلم مع أصحابك المقربين بطريقة,ومع مديرك في الشغل بطريقة تانية, ومع والديك بطريقة تالتة, ومع سواق الميكروباص بطريقة رابعة وهكذا.
وده مش نفاق, ده إسمة ذكاء إجتماعي, إنك تعرف إزاي تتكلم مع كل فئة بالطريقة اللي تفهمها عشان تقدر تتفاهم معاهم وتوصل للي إنت عايزه.
نفس الكلام بنعمله في التسويق.
طب إزاي أعرف الفئة المستهدفة؟
أول حاجة هتشوف المنتج اللي إنت بتبيعه عبارة عن إيه بالظبط, وغالبا هتلاقي العميل “اللي هو صاحب البراند” عارف مين زبونه اللي بيشتري منه بالظبط.
فمثلاً لو هتبيع أدوات تجميل:
يبقى كده عرفت إنك هتستهدف الستات والبنات.
وهتشوف سعر الأدوات دي غالي ولا رخيص عشان تعرف طبقتهم الإجتماعية.
وهتسأل صاحب الشغل يقدر يوصل المنتجات في أي مناطق عشان تقدر تحدد الفئة المستهدفة بتاعتك ساكنة فين وهكذا.
يعني هتحتاج تتناقش مع العميل وتعرف منه تفاصيل كتير عن المنتج وتسأله عن الـTarget Audeince عشان تعرف إنت بتسوق لمين
طب إيه هي الأسئلة اللي هتتناقش فيها مع العميل عشان تعرف تفاصيل أكتر عن الـ Target Audience؟
كل الأسئلة جمعنهالك في فايل واحد
عشان ترجع ليها وقت ما تحتاجها.