كيف تكون ميديا باير؟

وظيفة الميديا باير كانت موجودة من زمان مش اختراع جديد ولا حاجة، فقبل عصر الديجيتال ماركتنج كانت الشركات بتقوم بعمل الدعاية والإعلان عن منتجاتها من خلال التليفزيون والراديو واللوحات الإعلانية الموجودة في الأماكن العامة لجذب جمهورها المستهدف بحيث إن الشركة تقدر توصل لعدد كبير من جمهورها بالمعرفة بمنتجات وخدمات هذه الشركة.

على سبيل المثال لو في شركة فنادق عايزة تعلن عن خدماتها، فالشركة دي هتشتري مثلاً لوحة إعلانات داخل المطارات المختلفة سواء كانت دولية أو محلية للإعلان عن خدماتها للمسافرين القادمين داخل البلد علشان يتعرفوا على الشركة ونوعية الخدمات اللي ممكن تقدمها ليهم مثل إقامة في الفنادق – جولات سياحية للأماكن المشهورة داخل البلد – مواصلات – مطاعم – تسوق وغيرها من الخدمات اللي بيحتاجوها للتمتع بإقامة جيدة داخل البلد.

ولكن مع ظهور عصر الديجيتال ماركتنج وانتشار منصات التواصل الاجتماعي فيسبوك – انستجرام – يوتيوب – تيك توك – سناب شات اصبح شكل الإعلان والجمهور المستهدف على كل منصة مختلف عن الأخرى فأصبح ينتشر مفهوم الميديا باير.

لازم تعرف ان الموضوع مش عبارة عن نشر بوستات يومية وخلاص، لا طبعا الميديا باير لازم يكون عارف فن التسويق، فمثلا المحتوى اللى بتقدمه على انستجرام مختلف عن محتوى لينكدان أو محتوى فيس بوك فعملاء الانستجرام يهتمون بالصور والفيديوهات اكتر وهكذا.

كمان لازم تعرف في الأول طبيعة المنتج اللي بتعرضه وإيه هي مواصفاته وإيه هي المنصة المناسبة لعرض هذا المنتج واللي ممكن يحقق نجاحًا فيها أكتر علشان كده الميديا باير بيحدد الجمهور المستهدف والميزانية للإعلانات والاهتمام بالمحتوى الإعلاني ووضع الاستراتيجية التسويقية المناسبة ودراسة نقاط القوة والضعف للمنافسين وقياس نتيجة الحملة الاعلانية هل حققت الهدف منها أم لا؟ وهل الاعلان في الاتجاه الصحيح ولا محتاج تعديل؟